Ridicula nomina scientifica

Nomina scientifica specierum omnium in lingua Latina sunt, tametsi Latinitas pura non est, sed aevi hodierni. Hoc systema nomenclaturae binominalis a Carolo Linnaeo (aliisque eruditis) ordinatum est. Multis speciebus, quae nuper reperiuntur, nomina ridicula data sunt. Haec sunt nonnulla nomina, quae puto maxime insolita esse.

AEGROTOCATELLVS non est catellus neque aegrotat. Est genus trilobitae. (Hui, forsitan aegrotaverint, quod trilobitae iam extinctae sunt!) Nuncupaverunt hanc speciem Adrain et Edgecombe anno 1995 (eodem quo natus sum).

AHA HA nomen speciei vespae Australianae est. Secundum Arnoldum Menke, qui ipse nominavit Aha ha, dum perspiciebat specimina nonnulla invenit vespam quandam clamavitque “Aha, genus novum est!”, tum Ericus Grissell respondit non sine quadam dubitatione: “Ha!”

BA HVMBVGI! Nec Ebenezer Scrooge nec Carolus Dickens, sed Alan Solem malachologicus nominavit hanc speciem cochleae. Est species typica generis Ba, quia unica species est in hoc genere. Pro dolor, in extremo extinctionis periculo est.

CANIS LATRANS (vulgo coyotl, verbum navatlacum). Anglice dicitur coyote. Hoc animal certe appellare possumus nominibus aliis (e.g. lupus pretensis, vulpes indica, vel coiotes/coiotis), attamen, mihi placet canis latrans. Etiamsi canis [lupus familiaris] est alia bestia, tamen canis qui latrat est quoque canis latrans. Videtur ioculus esse. Coyote autem omnino differt: subgenus est helminthoglyptae (genus cochleae)!

IA IO! Heus, non interiectio, sed nomen vespertilionis familiae Vespertilionidae. Censeo id notabile nomen esse, quod omnes litterae quae continentur vocales sunt (quamquam littera I quoque consonans esse potest).

KAMERA LENS certe est verborum lusus, quod sonatur similiter ut “camera lens” (Anglice). Species unica in genere Kamera est. De hoc unicellulari organismo parum scimus.

SPONGIFORMA SQVAREPANTSII est species fungi familiae Boletaceae quae invenitur in Malaesia, Asia austro-orientali. Nuperrime descripta est (anno 2011). Ex nomine personae SpongeBob SquarePants in pelliculis animatis hanc speciem nuncupaverunt.

VINI VIDIVICI est species psittaci quae extincta facta est abhinc 700-1300 annos. Nomen deductum est ex lucutione clarissima Iulii Caesaris “Veni, vidi, vici!” Cavete, Quirites, nam nomen huius avis scribitur aliter: Vini cum littera i, non e.

Tantum est! De his omnibus nominibus scribere non possum. Primum, de zoologia, botanica bacteriologiaque parum scio; deinde, sunt nimis multa nomina quae puto esse ridicula, e.g. NEOPALPA DONALDTRVMPI, PARASTRATIOSPHECOMYIA STRATIOSPHECOMYIOIDES, etc. (placent autem mihi omnes!).

Scripsit Vincentius Nguien Giaciemensis Naevius

a.d. xiii Kal. Oct. MMXXII A.D.

Opera iniciuntur (praeter Vicipaediam)

Evans, Howard E. “The Discovery of Aha Ha.” Sphecos, Curatum est a Arnoldo Menke, vol. 7, Oct. 1983, p. 14.

Menke, Arnoldus. “Funny or Curious Zoological Names.” Bogus, vol. -2 (volumino negatori doso), pp. 24-27.

Yanega, Doug. Curious Scientific Names, https://faculty.ucr.edu/~heraty/yanega.html.